कडधान्यांची कचोरी

साहित्य – एक वाटी मूग, हरभरा डाळ, मसूर आणि काबुली चणे (रात्रभर किंवा सात ते आठ तास पाण्यात भिजत ठेवावं), प्रत्येकी एक चमचा धणे, जिरे आणि बडीशेपची भरड, अर्धा चमचा आमचूर पावडर, पाव ते अर्धा चमचा गरम मसाला, पाव चमचा हिंग, तिखट, मीठ, साखर, दोन चमचे बारीक चिरलेली कोथिंबीर, दोन ते तीन वाटी मैदा आणि कणीक समप्रमाणात, चार चमचे मोहन किंवा तूप, मीठ, तळण्यासाठी तेल.

कृती – प्रथम कुकरमध्ये दोन शिट्ट्या काढून कडधान्य शिजवून घ्या. नंतर ते गाळून कडधान्य किचन टॉवेलवर ठेवा. म्हणजे जास्तीचा ओलसरपणा निघून जातो. कढईत दोन चमचे तेल गरम करा. त्यात धणे, जिरं आणि बडीशेप याची भरड घाला त्यात हिंग, तिखट, हळद, आमचूर, मीठ, साखर, गरम मसाला आणि शिजवलेलं कडधान्य घाला. छान परतून घ्या. वरून कोथिंबीर घाला आणि गॅस बंद करून सारण थंड होऊ द्या.

मैदा आणि कणिकमध्ये मीठ, मोहन व साखर घालून पीठ मळून घ्या. मोहन सर्व कणकेला लागलं पाहिजे. मग पाणी घालून घट्ट मळून दहा मिनिटं बाजूला ठेवा. कढईत कचोरी तळण्यासाठी तेल गरम करायला ठेवा.मैद्याच्या पिठाचे पेढ्याएवढे गोळे करून पुरीपेक्षा जाडसर लाटा. त्यात चमचाभर सारण भरून बंद करा आणि हलक्या हातांनी दाबून गोल कचोरी करा. लागल्यास वरून तेल लावा आणि कचोरी मंद आचेवर कुरकुरीत खरपूस तळून घ्या.

टीप – कडधान्य शिजवलेल्या पाण्यातच कणिक मळून घ्या म्हणजे कडधान्यातलं सत्व वाया जाणार नाही.