झणझणीत पाटवडी रस्सा

साहित्य-

वड्यांसाठी-

दोन वाटी बेसन पीठ, दोन वाटी पाणी, दोन चमचे मिरची-आलं-लसूण पेस्ट, हळद आवश्यकतेनुसार, मीठ चवीनुसार, कोथिंबीर, मोहरी, जिरे, हिंग, तेल, सुके खोबरे सजावटीसाठी

रस्स्याच्या वाटणासाठी-

दोन कांदे चिरलेले, तीन चमचे सुके खोबरे, तीन चमचे तीळ, एक चमचा चिवड्याचे डाळे, अर्धा चमचा धणे, अर्धा चमचा खसखस, दालचिनीचा छोटा तुकडा, चार ते पाच काळीमिरी, एक लाल सुकी मिरची, एक दगळफुल, एक तमालपत्र, दोन चमचे आलं-लसूण-मिरची पेस्ट, धणे पावडर, लाल तिखट, गरम मसाला, मीठ

फोडणीसाठी- मोहरी, जिरे, हळद, हिंग आणि पाणी

सजावटीसाठी – कोथिंबीर, लिंबू

कृती

वड्या बनवण्यासाठी- एका नॉनस्टिक भांड्यात फोडणीचं साहित्य घेऊन फोडणी करून घ्यावी. त्यात मिरची-आलं-लसूण-पेस्ट घालून परतावं. नंतर हिंग, हळद आणि पाणी घालावं. पाणी उकळल्यावर त्यात बेसन पीठ घालून सतत ढवळावं. गुठळ्या होऊ देऊ नये. व्यवस्थित शिजल्यावर या मिश्रणाचा घट्टसर गोळा तयार होतो. एका ताटाला तेल लावून हे मिश्रण थापून घ्यावं आणि सुरीनं वड्या पाडाव्यात. सजावटीसाठी वरुन कोथिंबीर आणि सुकं खोबरं घालावं. थंड झाल्यावर वड्या काढून घ्याव्यात.

रस्सा बनवण्यासाठी- एका भांड्यात तेल घालून त्यात वाटणाचं साहित्य घालून त्याला खरपूस रंग येईपर्यंत परतून घ्यावं आणि पाणी न घालता मिक्सर मधून वाटून घ्यावं. कढईत जिरे-मोहरी-हिंग-हळद यांची फोडणी करून घ्यावी आणि त्यात मसाला वाटण घालून परतून घ्यावं. परतून झाल्यावर त्यात लाल तिखट, गरम मसाला, धणे-जिरे पावडर घालून थोडंसंच परतावं. तेल सुटायला लागल्यावर मीठ आणि गरम पाणी घालावं. हे मिश्रण चांगलं उकळून घ्यावं. सर्वात शेवटी त्यात वड्या घालाव्यात आणि कोथिंबीर घालून सजवावं. थोडे लिंबू पिळून सर्व्ह करावं.

अश्विनी जठार